Ajornartorsiutit misiligaanerillu (#7022)

Allanik Guutiunngitsumik ajornartorsiutinut ajugaasinnaasoqarnerluni? Oqarit: Guuti Unnersiutaali! Taanna Guutiuvoq! Tamarmik tassunga kiffaapput, tamarmillu Peqqussutaa naalassavaat!

-The Báb
-----------------------

Ajornartorsiutit misiligaanerillu (#7023)

Oqarit: Guuti tamanut naammattuuvoq tamanit, qilanni tamanit nunamiluunniit tamanit Guuti kisimi naammattuuvoq. Ilumut Nammineq Immini tassaavoq Ilisimasoq, Atatitsisoq, Ajugaqanngitsoq.

-The Báb
-----------------------

Ajornartorsiutit misiligaanerillu (#7024)

Pissaanerit pillugu qinnuigaakkit Guutiga-aa! Misilinneqarfiit nalaanni ajoquseqqunanga, isumaatsuliornerillu nalaanni Isumassarsisitsinerit aqqutigalugu allornikka aaqqeqqullugit. Guutiuvutit, Illit Piumasat naapertorlugu qanorluunniit iliornissamut Pissaaneqarputit. Kialuunniit Piumasat akiorsinnaanngilaa Siunertallu unitsissinnaanagu.

-The Báb
-----------------------

Ajornartorsiutit misiligaanerillu (#7025)

Naalagaq-aa! Tassaavutit anniaatinik tamanik Qimagutsitsisoq naalliuutinillu Peersitsisartoq. Tassaavutit Taanna aliasunnernik tamanik piujunnaarsitsisoq, naalliutsitaasunillu aniguisitsisoq, tarnit tamarmik Annaassisuat. Naalagaq! Naakkinninnerit aqqutigalugu aniguisitsinermik tunniussigit. Kiffavillu annassimanermik angusaqarsimasut akornannut naatsorsuutinnga.

-The Báb
-----------------------

Ajornartorsiutit misiligaanerillu (#7026)

Ilisimalluarpat, Guutiga-aa, misiligaaffiit sumit tamaanngaanniit takkusoorfigisimagaannga allamillu Illiunngitsumik peerneqarsinnaanatillu allanngortinneqarsinnaanngitsut. Ilinnik asanninnikkut qularinngilara tarnimut kinaagaluartumulluunniit misiligaaffiit tutsikkunnanngikkitit Paradisinni qilammiorpaluttumi sumut killiffiata nersorneqarnissaa kissaatigisimanngikkukku inuunermilu maani nunamiorpaluttumi uummataa Pissaanerpit sunit tamanit ajugaasup sernissuinerata assiaqusernerani nukittorsarnianngikkukku, taamaalillugu nunarsuup massumap imaqanngissusiinut kajumertunngoqqunagu. Ilumummi ilisimalluarpat Ilinnik eqqaamanninneq qanoq ilisukkulluunniit pingaartinnerujuassagiga qilaat nunarsuullu imarisaaninngaannit tamanit. 
Uummatiga pissatsiguk, Guutiga-aa, Ilinnik maleruussinikkut Asanninnikkullu, Akeqannillu qanorluunniit amerlatigigaluartunit assersimalluinnaqqullunga. Ilumut, Illit Naalannassutsikkut uppernarsaatigaara Ilinnut taamaallaat iluunngarlunga kipisallunga, allamillu qunugisaqarnanga taamaallaat Naapertuilluarnerit. Qinnuigaakkit uanga Asasatillu qanorluunniit Piumasat malillugu isumakkeerfigeqqulluta. Ilumut, tassaavutit Sunit Tamanit Anginersaasoq, Tukkusooq. 
Killeqanngitsumik Naalannarsingaarit, Illit-aa qilaat nunallu Naalagaa, inuit tamarmik unnersiutiginninnerit Qutsinnerungaartutit, qanortoq eqqissinerup kiffatit Ilumoortut nalaariligit, Guutilu unnersiutigineqarli silarsuit tamarmik Naalagaat.

-The Báb
-----------------------

Ajornartorsiutit misiligaanerillu (#7040)

Tassaavoq Misiginneqataasoq, Tukkusooq. Guuti-aa, Guutiga! Isigaarma nalunngilarma; Tassaavutit Qimarnguffigisara Annertoqqutiga. Allamik Illiunngitsumik qinigaqanngilanga, allamillu qinigaqarniarnanga, aqqutiginngisannik allamik tummagaqarsimanngilanga, aqqummillu allamik tummagaqassananga Asanninnerpit aqqutaanngitsumik. Ernumatsannerup unnuaani taaqisumi ilimasulluarlunga neriulluarlungalu Saammaassinerpit naassaanngitsup qaaneranut saappunga, qaalernermilu Kusanassuserpit Naammalluinnassuserpillu eqqaamanninneranik tarniga nakangasoq inuummarissisinneqarpoq nakussatsinneqarlunilu. Kinaluunniit Naakkinnissuserpit saammaanneranik ikiorneqartoq, kuserninnguugaluaruniluunniit imavissuartut killeqanngitsutut ilissavoq, qiviunnguugaluaruniluunniit Asanninnerpit kuugaarneranit ikiorneqartoq qaammassavoq, allaat ullorissatut qaammarissutut qaamatigilerluni. 
Kiffat una nammineersinnaanngissutsit qilarsugaat, kajumissuseqalersimasoq, Illersuinerpit ataanut pisiguk, Illit minguissutsip anersaava, Illit tassaasoq tukkusumik kikkunnik tamanik Isumaginnittoq. Silarsuarmi maani tapersersoruk Ilinnut asanninnermini mattusuunngoqqullugu aalajaatsunngoqqullugulu, Isumagigiuttaaq una timmiaq isarorsimasoq Ullunni naleqanngitsuusumi naalagaaffiinniittumi oqquiffissarseqqullugu qimaaffissarseqqullugulu.

-`Abdu'l-Bahá
-----------------------

Ajornartorsiutit misiligaanerillu (#7041)

Naalagaq-aa, Guutiga naalliunnermit nalaarneqaraangama qimarravigisartagara. Aliasukkuma Eqqornaveeqqutigalugulu Qimarravigisartagara! Eqqissarfiga ajorsaruma Qimarravigisagara kiserliorumalu Aappersuisora. Anniaateqaruma Tuppallersaasiga avinngarusimaninnilu asannitsigalugu Ikinngutigisagara. Aliasuutimma anniaataannik peersitsisartoq ajortuliannillu Isumakkeerisoq. 
Tamaviaarlunga Illit kisivit saaffigaakkit, uummatikkullu iluunngarlunga, tarninnik oqqannillu qinnuigaakkit Ataasiussutsivit guuterpaluttup piffissarititaani Illit piumasannut akerliusunut tamanut assersimaqqullunga, mingutsisitaanernillu tamanit Saammaannerpit orpiata alannguanut oqquiniarnissamut uannik akornusiisinnaasunut minguiannga, minguitsooqqullunga isornaateqanngitsooqqullungalu. 
Naalagaq-aa, sanngiitsut nallittukkit, napparsimasut ajorunnaarsikkit qilalersullu immillugit.
Uummat, Asanninnerpit innerata aamaartitaa qiimmattarli, Asanninnerpit qilammiorpaluttup Anersaarpillu ikumanerinit ikummarissarneqarli. 
Iluarsutsip ataasiusutut ataatsimut oqqiorfiat pilluaqqujuk Saammaannerpillu niaqorutaanik niaqorusinnga. Tukkussutsivit seqerngata kiinnakkut qaammarsarlinga saammaallutillu ikiunnga Isaaffippit Iluartup eqqaani Kiffartuussinnaaqqullutit.
Uummatiga Pinngortitannut asanningaalersiguk Nallittuingaarninnullu uppernarsaataalanga, Saammaannernullu ilisarnaataallunga, tassaalangalu Asasannut eqqisseqatigiinnermik pilersitsisoq, Ilinnut tunniuttoq, Ilinnik eqqaamannittoq, Illit pinnik tamanik isumaliutiginninnermigut imminut puigortoq. 
Guuti-aa, Guutiga! Isumakkeerfiginninnerpit Saammaannerpillu anorai sallaatsut uannut tunuteqinagit, Ikiuinerpillu Iluarinninnerpillu puilaffiat uannit peerseqinagu. 
Suluppit tamanut illersuisuusut ataanni eqqissilangatoq, Isivit naassaanngitsussamut isigisut piggattuarilinngatoq. 
Innuttavit akornanni oqqannik Illit aqqit unnersiuitigilara katersaarsuit akornanni nipiga tusarneqarsinnaanngortillugu qanortorlu unnersiutiginninnera qaninnit eqqissinermik nassataqarluni aniagili.
Ilumut tassaavutit Saammaassisoq, Iluartoq, Pissarsuaq Ajugaqanngitsoq.

-`Abdu'l-Bahá
-----------------------

